Tilawate Quran

Tilawate Quran

ALLAH Ta'ala ka Irshad hai "Quran se jo Maissar aaye Padho" Dusri jagah farmaya "Jab Quran padha jaye to isse Suno awr chup raho is Umeed par ke Reham kiye jao" Ek Ayat ka Hifz karna har Musalman Mukalif par Farz E Ain hai awr Pure Quran Majeed ka Hifz karna Farz E Kifaya hai jabke Surah Fatiha awr koi Choti Surat ya iski Misl 3 Choti Ayatein ye Ek Badi Ayat Zubani yaad karna Wajib hai. Fiqaha ke Masail ka janna Farz E Ain hai awr Hajat se zayid Fiqaha sikhna Pora Quran Kareem Hifz karne se Afzal hai. Quran Kareem Dekh kar padhna Zubani padhne se Afzal hai ke ye padhna bhi hai awr Dekhna bhi awr iska Chu na bhi awr yeh sab Ibadat hai. Mustahab ye haike Ba Wazu Qibla Ru Saaf Lib'as pehankar Tilawat karein. Tilawat ke shuru me Aouzbillah padhna awr Bismillah padhna Mustahab hai. agar Surat ki Ibtedah hoto Bismillah padhna Sunnat hai. agar Tilawat ke dauran koi Dunyawi kaam karlein to Tauz awr Tasmiyah fir padhein.

Lait kar Tilawat karna jaiz hai Bashartke Pawon Simte hoon, yunhi chalne awr kaam karne ki halat me bhi Tilawat jaiz hai jabke Dil Ghafil na ho warna Makroh hai. jab Buland awaz se Tilawat ki jaye to tamam Hazirein par Sunna Farz hai. Quran Kareem Sunna Tilawat karne awr Nafl padhne se Afzal hai. Majmua me sab log Buland Awaz se Quran padhein to ye Haraam hai. aksar Quran Khwani me sab Buland Awaz se padhte hain ye Haraam hai. jab ziada log padhne wale hoon to inhe chahiye ke Ahista Tilawat karein albatta itni Awaz zarur hoke agar wahan Awaz sunne me koi Rukawat maslan Shor wagairah na hoto padhne wala khud apni Awaz sun sake.

ط ت , س ث ص , ذ ز ظ , ا ء ع , ه ح , ض ذ  ظ

In Huroof me sahih taur par Imtiyaz rakhein awr inhe Asal Makhraj se ada karein warna Maane fasid hone ki Surat me Nam'az na hogi. Quran Majeed (Hifz ya Nazirah) padhkar bhula dena Gunah hai. Hadees Shareef me haike jo Quran Majeed padhkar bhul jaye woh Qayamat me Kodi hokar aayega awr Quran Majeed me hai aisa Shaks Andha hokar uthega. Quran Kareem Hifz karne awr iske Ahkaam par amal karne walon ko na sirf Jannat Ata hogi balke ALLAH Ta'ala unke in 🔟 Ahl Khana ke mutaliq inki Sifarish Qubool farmayega jinpar Jahannum Wajib hochuki hogi.